| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 7.23 | Dem. 7.27 (English) | >>Dem. 7.32 |
7.26καὶ ὅτι μὲν δοὺς τὴν ἐπανόρθωσιν νῦν ἔξαρνός ἐστιν , ἅπαντες ἴστε . φησὶ δʼ Ἀμφίπολιν ἑαυτοῦ εἶναι · ὑμᾶς γὰρ ψηφίσασθαι ἐκείνου εἶναι , ὅτʼ ἐψηφίζεσθε ἔχειν αὐτὸν ἃ εἶχεν . ὑμεῖς δὲ τὸ μὲν ψήφισμα τοῦτʼ ἐψηφίσασθε , οὐ μέντοι γʼ ἐκείνου εἶναι Ἀμφίπολιν · ἔστι γὰρ ἔχειν καὶ τἀλλότρια , καὶ οὐχ ἅπαντες οἱ ἔχοντες τὰ αὑτῶν ἔχουσιν , ἀλλὰ πολλοὶ καὶ ἀλλότρια κέκτηνται · ὥστε τοῦτό γε τὸ σοφὸν αὐτῷ ἠλίθιόν ἐστιν .
7.27καὶ τοῦ μὲν Φιλοκράτους ψηφίσματος μέμνηται , τῆς δʼ ἐπιστολῆς , ἣν πρὸς ὑμᾶς ἔπεμψεν ὅτʼ Ἀμφίπολιν ἐπολιόρκει , ἐπιλέλησται , ἐν ᾗ ὡμολόγει τὴν Ἀμφίπολιν ὑμετέραν εἶναι · ἔφη γὰρ ἐκπολιορκήσας ὑμῖν ἀποδώσειν , ὡς οὖσαν ὑμετέραν καὶ οὐ τῶν ἐχόντων .
7.28κἀκεῖνοι μέν , ὡς ἔοικεν , οἱ πρότερον ἐν Ἀμφιπόλει οἰκοῦντες πρὶν Φίλιππον λαβεῖν , τὴν Ἀθηναίων χώραν εἶχον , ἐπειδὴ δὲ Φίλιππος αὐτὴν εἴληφεν , οὐ τὴν Ἀθηναίων χώραν ἀλλὰ τὴν ἑαυτοῦ ἔχει · οὐδʼ Ὄλυνθόν γε οὐδʼ Ἀπολλωνίαν οὐδὲ Παλλήνην , οὐκ ἀλλοτρίας ἀλλὰ τὰς ἑαυτοῦ χώρας κέκτηται .
7.29ἆρʼ ὑμῖν δοκεῖ πεφυλαγμένως ἅπαντα πρὸς ὑμᾶς ἐπιστέλλειν , ὅπως ἂν φαίνηται καὶ λέγων καὶ πράττων ἃ παρὰ πᾶσιν ἀνθρώποις ὁμολογεῖται δίκαια εἶναι , ἀλλʼ οὐ σφόδρα καταπεφρονηκέναι , ὃς τὴν χώραν , ἣν οἱ Ἕλληνες καὶ βασιλεὺς ὁ Περσῶν ἐψηφίσαντο καὶ ὡμολογήκασιν ὑμετέραν εἶναι , ταύτην φησὶν ἑαυτοῦ καὶ οὐχ ὑμετέραν εἶναι ;
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 7.23 | Dem. 7.27 (English) | >>Dem. 7.32 |
